Астанада «Біз Біргеміз Fest» қайырымдылық концерті өтті

Астана, NEGE. Фесттің басты қонағы болған әлемге танымал әнші Димаш Құдайберген қайырымдылық концертін қолдап келген көрерменге ыстық ықыласын білдіріп, қазіргідей қиын жағдайда айналаға тек мейірім мен ізгілік шуағын таратуға шақырды.

–Сіздерді көргеніме өте қуаныштымын. Жүректеріңіздегі жылуға тәнтімін, мейірімдеріңізге разымын. Осынау үлкен қайырымды істі қолдап келіп отырған сіздерге алғысым шексіз. Көп рақмет бәріңізге, – деді Димаш.  

«Біз біргеміз Fest» іс-шарасында еліміздің барлық өңірлерінен келген дарынды балалар мен мүмкіндігі шектеулі жастар бас қосты.
Фестиваль барысында көру мүмкіндігінен айырылған әнші Кенжебек Нұрдолдайға Алматы қаласынан 2 бөлмелі пәтер кілті, елордалық жалғызбасты ана Әсел Омароваға Астана қаласынан 1 бөлмелі пәтер кілті табысталды.

Biz Birgemiz Qazaqstan қорының жетекшісі Перизат Қайрат елімізде қолдауды қажет ететін көптеген ерекше жан бар екенін айтты.

–Біздің қорымыз үш жылдан бері мүмкіндігі шектеулі адамдарға көмектесумен айналысып келеді. Бізге сол талантты жандардың өз қабілеттерін дамытуына жағдай жасау керек. Бүгінгі шараны демеушілердің көмегімен өткізіп жатырмыз. Билеттен түскен қаржының бәрі қайырымдылық бағытында, медициналық орталықтың құрал-жабдықтарын алуға жұмсалады, – деді ол.
Концерт аясында Кенжебек Нұрдолдай, SENSITIVE би тобы, Севда Алиева, Алтыншаш Мұқатаева сынды ерекше қажеттілігі бар музыканттар мен бишілер өнер көрсетті.

Сондай-ақ эстрада жұлдыздары: Қарақат Әбілдина, Тамара Асар, Назима, «Бастау» тобы, KOBA&MANS, Mona Songz, ALPHA, Aidyn, Данияр Өтеген, Бағжан Октябрь, Ақтоты Болшова, Әлішер Қонысбай және тағы басқалары өз өнерлерін көрермендердің назарына ұсынды.

Бұл ауқымды іс-шараны Biz Birgemiz Qazaqstan қоры Астана әкімдігімен бірігіп ұйымдастырды.