Астанада биыл 1900 орынға арналған 5 студенттік жатақхана қолданысқа беріледі
Жатақхана салу – өте өзекті мәселенің бірі. Бұл туралы Мемлекет басшысы Қасым-Жомарт Тоқаев елорданы дамыту мәселелері жөніндегі кеңес отырысында айтқан болатын.
Алматы, NEGE. Астанада биыл 1900 орынға арналған 5 студенттік жатақхананы аяқтап, қолданысқа беруді жоспарлап отыр. Ал 2025 жылға дейін жеке инвесторлар мен жоғары оқу орындарының меншікті қаражаты есебінен 11 мыңға жуық орынды пайдалануға беру жоспарда бар, деп хабарлайды елорда әкімдігінің ресми сайты.
Астанада студенттік жатақханалар салу бойынша жобалық кеңсе ашылды. Фронт-офистің негізгі міндеті - жатақханалар салу жөніндегі мемлекеттік бағдарламаны іске асыру үшін қолайлы жағдайлар жасау және студенттерді тұрғын үймен қамтамасыз ету, сол сияқты ЖОО-лар мен әлеуетті инвесторларға заңгерлік, консультациялық және сараптамалық қолдау көрсету. Жобалық кеңсенің ашылуында Астана әкімі Жеңіс Қасымбек пен ҚР Ғылым және жоғары білім министрі Саясат Нұрбек құттықтау сөз сөйледі.
«Елордаға оқуға келетін студенттер саны жыл сайын артып келеді. Қалада 15 жоғары оқу орны бар, онда 67 мыңға жуық студент оқиды. Олардың бір көлігі бұл қаладан емес. Жауапты министрлікпен бірлесіп инфрақұрылымды құру бойынша жұмыс жүргіземіз. Жатақханаларда кезең-кезеңімен орын дайындаймыз. Бұл жұмыс инвесторларды да, жоғары оқу орындарын да жұмылдыра отырып жүргізіледі. Біз өз тарапымыздан жер учаскелері мен әкімшілік мәселелер бойынша көмек көрсетеміз», - деді Астана әкімі Жеңіс Қасымбек.
Биыл «Қаржы орталығы» АҚ ҚР Ғылым және жоғары білім министрлігі әзірлеген жаңа тетік бойынша субсидиялауға және басқа да мәселелерде көмек көрсетеді. Бұл тетік әрбір төсек-орын үшін жаңа жатақханалар салу кезінде субсидияларды көздейді.
Инвесторлар, ҚР Ғылым және жоғары білім министрлігі, Астана әкімдігі, «Қаржы орталығы» АҚ және бірқатар ЖОО арасында студенттік жатақханалар салу бойынша ары қарай да жемісті ынтымақтастық орнату туралы меморандумдар жасалды.
«Жатақхана салу – өте өзекті мәселенің бірі. Қазір студенттерге 13 мыңға жуық орын жетіспейді. Алайда, Үкімет бұл түйткілді шешуге мән беріп отырған жоқ. Ғылым және жоғары білім министрлігі осы мәселелерді ерекше бақылауға алуы керек», - деген еді Мемлекет басшысы Қасым-Жомарт Тоқаев елорданы дамыту мәселелері жөніндегі кеңесте.
Студенттер жаңа жайлы жатақханлармен қамтамасыз етіліп, алаңсыз білім алуларына барынша жағдай жасалуы тиіс.
