20 мая 2025 г. 14:02
Астанада жолға таласқан Audi және Chevrolet Cobalt автокөліктерінің жүргізушілері 15 тәулікке қамалды
Әлеуметтік желілерді мониторингтеу барысында полиция қызметкерлері Жұмабаев пен Айнакөл көшелерінің қиылысында екі жүргізуші арасында болған төбелесті анықтады.
Астана, NEGE. Белгілі болғандай, Audi және Chevrolet Cobalt автокөліктерінің жүргізушілері арасында жолды бөлісе алмаудан кикілжің басталып, арты жұдырықтасуға ұласқан.
Жолда төбелескен жүргізушілер дереу ұсталды. Ұсақ бұзақылық бойынша әкімшілік іс қозғалды.
Сот шешімімен әрбір құқық бұзушыға 15 тәулікке әкімшілік қамау жазасы тағайындалды.
