Астанада Жеңіс күніне арналған «Jastar Talks» кездесуі өтті
Астанадағы Қызмет көрсету және туризм колледжінде Жеңістің 80 жылдығына арналған «Jastar Talks» форматындағы ерекше кездесу өтті. Іс-шараны Астана қаласы әкімдігінің «Астана жастары» жастар ресурстық орталығы ұйымдастырды.
Астана, NEGE. Бұл кездесудің басты мақсаты – жастардың тарихи санасын қалыптастырып, ұлттық құндылықтарды дәріптеу және олардың азаматтық белсенділігін арттыру.
Шараның құрметті қонағы ретінде Астана қаласының Қорғаныс істері департаментінің өкілі, отставкадағы полковник Ғани Асылбекұлы Артықов шақырылды. Ол жастармен еркін форматта пікір алмасып, өмірлік тәжірибесімен бөлісті, соғыстан кейінгі кезеңдегі отансүйгіштік пен борыш сезімі туралы баяндады.
Колледж студенттері кездесуде белсенділік танытып, патриотизм, ел тарихы және қазіргі жастардың рөлі туралы көкейлеріндегі сауалдарын қойды. Ардагердің шынайы әңгімелері жастарға рух беріп, болашаққа деген көзқарастарын тереңдетті.
«Jastar Talks» – жастар мен аға буын арасындағы байланысты нығайтатын ашық диалог алаңы ретінде өз маңыздылығын тағы бір мәрте дәлелдеді. Іс-шара, әсіресе Ұлы жеңіс күні қарсаңында ұрпақтар сабақтастығын жаңғыртып, ел тарихына деген құрметті арттыруда маңызды рөл атқарды.
