Астанада «Хан Шатыр» сауда ойын-сауық орталығы сатыла ма?
Krisha.kz сайтында «Хан Шатыр» сауда ойын-сауық орталығының мекен-жайы көрсетілген хабарландыру жарияланды.
Астана, NEGE. Хабарландыруда аталмыш нысанның сатылымға шығарылғанын аңғаруға болады. Бағасы – 17 млрд 250 млн теңге деп көрсетілген.
«Нұра ауданында орналасқан, жеке тұрған, еркін мақсатқа арналған ғимарат сатылады. Ғимараттың жалпы ауданы – 15 800 шаршы метр, оның ішінде 800 шаршы метр жабық паркингке тиесілі. Сонымен қатар, ашық автотұрақ қарастырылған. Ғимарат аумағын толық қоршауға мүмкіндік бар», – делінген хабарландыруда.
Хабарлама авторы барлық сұрақтың кездесу барысында талқыланатынын, сонымен қатар риелторлармен жұмыс істемейтінін атап өткен.
Естеріңізге сала кетейік, Хан Шатыр – Астана қаласында орналасқан ірі ойын-сауық және сауда орталығы. Ол 2010 жылы 6 шілдеде Астана күніне орай ашылған.