Астанада автосалон менеджері 53 млн теңгенің сегіз көлігін заңсыз сатып, қаржыны өз қалтасына басқан
Астанада автодилерлік компанияның сату бөлімінің менеджері 69,6 млн теңге көлемінде залал келтіргені үшін 6 жылға сотталды.
Астана, NEGE. Бұл туралы қалалық қылмыстық істер жөніндегі ауданаралық сот хабарлады.
Сот анықтағандай, сотталушы жалған құжаттар арқылы жалпы құны 53,1 млн теңге болатын сегіз JAC J7 автокөлігін сатып, түскен ақшаны компания кассасына өткізбеген.
Бұдан бөлек 2026 жылғы қаңтарда ол тағы бір сатып алушыға осы маркадағы үш көлікті төмен бағамен сатуды ұсынып, одан 16,5 млн теңге алған. Алайда автокөліктерді бермей, ақшаны өз қажетіне жұмсаған.
Прокурор сотталушыны 8 жылға бас бостандығынан айыруды сұраған. Сот оның кінәсін мойындап, өкінгенін, кәмелетке толмаған баласы барын және бұрын сотталмағанын ескеріп, 6 жылға бас бостандығынан айыру жазасын тағайындады.
Сондай-ақ ол коммерциялық ұйымдарда тауарлар мен қызметтерді сатуға байланысты лауазымдарды атқару құқығынан 8 жылға айырылды. Жәбірленушілердің азаматтық талаптары қанағаттандырылды.
Үкім заңды күшіне енген жоқ.