Astana Open турнирінің чемпиондары анықталды
Елордада Astana Open ATP 250 турнирі мәреге жетті.
Нұр-Сұлтан, NEGE. Жекелей сында финалда әлемнің 65-ракеткасы, аустралиялық Джеймс Дакворт пен дүниежүзілік рейтингте 82-орында тұрған оңтүстіккореялық Квон Су Ву бас жүлдені сарапқа салды. Сағат жарымнан астам уақытқа созылған матчта оңтүстіккореялық теннисші қарсыласын 7:6 (8:6), 6:3 есебімен ұтты. Өз спорттық жолында айтулы табысына қол жеткізген Квон Сун Ву бәсеке барысында 4 эйс жасап, 6 брейк-пойнтттың екеуін мүлт жіберген жоқ.
Қарсыласы 10 эйс жасағанымен, 1 брейкпен шектелді. Жұптық сында жарыстың 1-ракеткалары, мексикалық Сантьяго Гонсалес пен аргентиналық Андреас Мольтени жеңімпаз атанды. Олар соңғы бәсекеде Израиль өкілі Йонатан Эрлих пен белоруссиялық Андрей Василевскийді 6:1, 6:2 есебімен тізе бүктірді.