Астана әкімі Агроқалашық тұрғындарымен кездесті
Астана қаласының әкімі Жеңіс Қасымбек Instagram парақшасында Агроқалашық, елді мекенінің тұрғындарымен кездесуде көтерілген мәселе туралы айтты, деп хабарлайды елорда әкімдігінің ресми сайты.
Астана, NEGE. «Агроқалашық елді мекенінің (Сарыарқа ауданы) тұрғындарымен нәтижелі кездесу өткіздік. Тұрғындар жолдар мен тротуарлар, инженерлік желілер салу, жарықтандыру, бейнебақылау камераларын орнату, тозығы жеткен тұрғын үйлерді бұзу, газдандыру секілді т.б. мәселелерді көтерді. Сұрақтар жеткілікті, олар шешімін табады», – деді Астана қаласының әкімі.
Сонымен қатар қала әкімі тұрғындармен бірге ең алдымен орындалуы тиіс міндеттерді белгілеп алатынын тілге тиек етті.
Оның айтуынша, Агроқалашық елді мекені кестеге сәйкес кезең-кезеңімен дамитын болады.
«Мәселен тұрғындар газдандыру мәселесін көтерді. Агроқалашық елді мекені газдандырылған, бірақ жекелеген тұстары бар, олар бойынша биыл жұмыс жобасын аяқтаймыз, ал келер жылы желі құрылысын бастаймыз және қалған үйлерді газға қосамыз.
Сол сияқты апатты үйлерді бұзу бойынша да сұрақтар бар. Келесі жылы аталмыш елді мекенде үш үйді бұзуды жоспарлап отырмыз. Қала бойынша барлығы 200-ден астам апатты үй бар. Алдағы 3 жылда тозығы жеткен үйлердің тұрғындары үшін 2,5-3 мыңға жуық пәтер салуды жоспарлап отырмыз», – деп бөлісті әкім.
Жиын барысында ауыз су мәселесі де айтылды.
«Сондай-ақ сумен жабдықтау бойынша сұрақтар бар: жаңа ауыз су станциясы (ССС-3) арқылы осы мәселені биыл маусым айында ішінара шешеміз, ал тамыз айында тәулігіне 100 мың текше метрден астам су беріледі.
Абаттандыру маусымын ескере отырып, аудандарда жолдар, тротуарлар, аулалар мен қоғамдық кеңістіктер салу жұмысы жүріп жатыр», – деп жазды Жеңіс Қасымбек.
