Апартаменттер, Rolls-Royce, Bentley: Койновтың ісі бойынша мүліктер бұғатталды
Қаржылық мониторинг агенттігі блогер және бизнесмен Сергей Койновқа қатысты тергеу аяқталғанын хабарлады.
Астана, NEGE. ҚМА мәліметінше, өткен жылдың қыркүйек айында комиссиялық дүкен ретінде жасырынған ірі ломбардтар желісі арқылы заңсыз микрокредит беру схемасы анықталған.
«"Актив Ломбард" желісінің иесі Койнов комиссиялық қызметті пайдалана отырып, жеке тұлғаларға жасырын түрде микрокредит берудің заңсыз схемасын ұйымдастырды деген күдікке ілінді.
Қызметіне заңдылық сипат беру үшін Койнов материалдық-техникалық базасы мен әкімшілік ресурстары бар өзіне бағынысты "Актив Ломбард" ЖШС-ін пайдаланып, сенімді тұлғалардың атына тіркелген және формалды түрде комиссиялық саудамен айналысқан "One Billion Sales", "The Best Seller" және "Shark in Sales" ЖШС сияқты байланысы бар заңды тұлғалар желісін құрды», – делінген ресми хабарламада.
Бұл компаниялар, ҚМА дерегінше, «Актив Маркет» бірыңғай брендімен әрекет еткен.
Комиссиялық бөлімшелер «Актив Ломбард» ЖШС филиалдарымен бір ғимаратта орналасқан, ал клиенттерге қызмет көрсетуді бірдей қызметкерлер іске асырған.
«Клиенттермен жасалған комиссиялық шарттар формалды және жалған сипатта болған. Сыйақы мөлшерлемесінің орташа деңгейі тәулігіне 1,73%-дан 2,07%-ға дейін жетіп, белгіленген нормадан (0,3%) 5 есеге жоғары болған, бұл азаматтардың құқықтарының елеулі бұзылуына әкеп соққан.
Нәтижесінде 1,9 млн-нан астам шарт жасалып, қылмыстық кіріс көлемі 19 млрд теңгеден асқан», – дейді агенттік өкілдері.
Тергеу материалдарына сәйкес, қылмыстық кірістердің шығу көзін жасыру мақсатында Койнов оларды заңдастырудың көп деңгейлі схемасын әзірлеп, іске асырған.
Ол үшін байланысы бар компаниялармен жасалған жалған шарттар пайдаланылған. Сондай-ақ банк шоттары арасында ақшаны бірнеше рет аударып, кейіннен оны дивиденд түрінде шығарған. Осы тәсілмен 5 млрд теңгеден астам қаражат шығарылған.
«Сонымен қатар Койнов бағдарламалық қамтамасыз ету әзірлеу саласында формалды түрде қызмет көрсеткен "Zeus Co" ЖШС-ін тіркеген. Бағдарламалық қамтамасыз етуді енгізу және сүйемелдеу қызметтері көрсетілді деген желеумен байланысы бар компаниялармен құны асыра көрсетілген шарттар жасалып, нәтижесінде "Zeus Co" ЖШС шоттарына 2,5 млрд теңге түскен, оның 2,2 млрд теңгесі Койновқа дивиденд түрінде аударылған», – делінген ҚМА мәлімдемесінде.
Сот санкциясымен конфискациялау мақсатында оның жалпы құны 8,9 млрд теңге болатын жылжымалы және жылжымайтын мүлкі, жарғылық капиталдағы үлестері және зергерлік бұйымдары бұғатталды.
Тыйым салынған мүлік қатарында: елордадағы 4 пәтер және 2 тұрғын үй, БАӘ-дегі 4 апартамент, 6 автокөлік, оның ішінде Lexus LX 600, Rolls-Royce Cullinan, Mercedes-Benz G63, Bentley Bentayga V8, Land Rover Range Rover Sport, сондай-ақ депозиттік шоттардағы 2,7 млрд теңге көлеміндегі ақшалай қаражат бар.
Койнов қамауға алынды.
Оның төрт сыбайласына қатысты елден шықпау және тиісті мінез-құлық туралы қолхат түріндегі бұлтартпау шарасы қолданылды.
