AMANAT партиясының депутаты көлікпен балалар мен 9 сиырды қағып кетті

Алматы, NEGE. Оқиға 2 шілдеде Қарағанды облысының Бұқар Жырау ауданында, «Ботақара-Доскей» тасжолында болды.

Куәгерлердің айтуынша, көлік тізгінінде Аманат партиясының Қарағанды облысы Бұқар Жырау ауданы бойынша филиалының төрағасы, аудандық мәслихат депутаты Анар Бозаева болған.

«Қазіргі уақытта ол демалыста. Жүргізушінің тәжірибесі бар екені және көлік апаты кезінде мас болмағаны анықталды. Қазіргі уақытта полиция департаменті жол апаты фактісі бойынша тергеу жүргізіп жатыр, оның нәтижелері бойынша барлық кінәлілер заңда көзделген жазаға тартылады», - деп хабарлады AMANAT партиясының Қарағанды облыстық филиалынан.

Әйел жолдан өтіп бара жатқан сиыр табынына соғылғаннан кейін, көлік руліне ие бола алмай, мотоциклмен келе жатқан сегіз және 16 жастағы екі адамды қағып кеткен.

«Апат салдарынан жасөспірімдер жарақат алып, медициналық мекемеге жатқызылды. Бұл факт полицияда тіркелген. Тиісті сараптамалар тағайындалды. Сотқа дейінгі толық және объективті тергеу жүргізілуде», - деп хабарлады Қарағанды облысы ПД баспасөз қызметі.