Алматыдағы жастар саны және олардың әлеуеті
Алматы қаласының халқының елеулі бөлігін жастар құрайды. Бұл — мемлекеттің болашағына тікелей әсер ететін әлеует. Жастардың саны, олардың жұмысқа тартылуы, білім алуы мен кәсіпкерлікке бейімділігі қаланың даму стратегиясымен тығыз байланысты.
2025 жылғы деректер бойынша Алматыда 14–35 жас аралығындағы жастар саны 695,6 мың адамды құрайды, бұл — қала тұрғындарының шамамен 32 пайызы. Олардың 442,3 мыңы еңбекке қабілетті, 286 мыңнан астамы студент, 80 мыңы мектеп оқушысы ретінде тіркелген. Жастар арасындағы жұмыссыздық көрсеткіші 23 мың адам деңгейінде, ал оқымайтын әрі жұмыс істемейтін жастар саны 47 мыңға жуық. Бұл – әлеуетті еңбек күшінің бір бөлігі толық пайдаланылмай отыр дегенді білдіреді.
Жастарды жұмыспен қамту мақсатында 2025 жылдың алғашқы жартысында қалалық мансап орталығы арқылы 7,5 мыңнан астам жасқа көмек көрсетіліп, оның 5,7 мыңы жұмысқа орналастырылды. Сонымен қатар, жастар тәжірибесі, алғашқы жұмыс орны, Jas Gala, JobFair365 сияқты жобалар жүйелі түрде жүргізілуде.
Әлеуметтік зерттеулерге сәйкес, алматылық жастардың 89,9%-ы отбасыны өмірлік басты құндылық санаса, 47,6%-ы достық пен әлеуметтік ортаны жоғары бағалайды. Өмірге қанағаттану көрсеткіші де жоғары: 77,8% орташа көрсеткіш тіркелген. Білім беру, кәсіпкерлік, мәдени және спорттық жобалар арқылы жастарды жан-жақты дамыту шаралары үздіксіз жүргізілуде.
Алматы жастары — қоғамның белсенді, ойлы әрі креативті бөлігі. Олардың әлеуетін тиімді пайдалану — қаланың ғана емес, елдің болашағы үшін маңызды. Мемлекеттік және қоғамдық қолдау арқылы жастарды жұмыспен қамту, білім беру, тұрғын үймен қамтамасыз ету бағыттары ары қарай да қарқынды жалғасуы тиіс.
