Алматыдағы элиталы тұрғын үй кешенінде жарылыс болып, екі бала зардап шекті
Әлеуметтік желілерде Алматыдағы Esentai City тұрғын үй кешенінде болған жарылыс салдары түсірілген видеолар тарады. Тұрғындардың айтуынша, оқиға салдарынан үш пәтерге зақым келген.
Астана, NEGE. Қалалық әкімдіктің хабарлауынша, оқыс оқиға бүгін, 22 қазанда болған. Алматының Медеу ауданындағы Қаппаров көшесінде орналасқан үш қабатты тұрғын үйде газ-ауа қоспасы жарылған.
Алдын ала мәлімет бойынша, жарылысқа табиғи газдың таралуы себеп болуы мүмкін.
Оқиға салдарынан кәмелетке толмаған екі бала жеңіл жарақат алды. Олар дәрігерлердің тексеруінен кейін үйлеріне жіберілген.
Қазіргі уақытта жауапты қызметтер жарылыстың себептері мен мән-жайын анықтап жатыр.