Алматыдағы әскери институттан сержанттың өлі денесі табылды
Алматыда Құрлық әскерлері Әскери институтының аумағынан 44 жастағы сержанттың мәйіті табылды. Ақпаратты Ішкі істер министрлігі растады.
Алматы, NEGE. «Аталған факті бойынша Оңтүстік өңірлік әскери тергеу басқармасы Қазақстан Республикасы Қылмыстық кодексінің 105-бабы 1-бөлігі (Өзін-өзі өлтіруге итермелеу) бойынша сотқа дейінгі тергеу амалдарын бастады», – делінген хабарламада.
Қазақстан Республикасы Қылмыстық-процестік кодексінің 201-бабына сәйкес өзге де мәліметтер жария етілуге жатпайды.
Құрлық әскерлері Әскери институтының баспасөз қызметінің хабарлауынша, 12 қыркүйекте институттың инженерлік қалашығы аумағынан 1980 жылы туған әскери қызметшінің мәйіті табылған.
«Алдын ала болжам бойынша, әскери қызметкер асылып, өз-өзіне қол жұмсаған. Аталған факті бойынша қылмыстық іс қозғалды. Себептері мен мән-жайы анықталуда. Тергеу шаралары жүргізілуде. Құрлық әскерлері Әскери институтының басшылығы әскери қызметшінің отбасы мен жақындарына қайғырып көңіл айтады, оларға барлық қажетті көмек көрсетіледі», – деді Әскери институттың баспасөз қызметі.