Алматыда студенттерге арналған жаңа жатақхана ашылды

Алматы, NEGE. Нысан жеке инвестициялар есебінен салынған. Бұл мегаполистегі студенттік инфрақұрылымды дамытуға арналған ауқымды бағдарламаның бір бөлігі әрі Алматының өңірдегі жетекші білім орталығы ретіндегі мәртебесін кезең-кезеңімен нығайтып келе жатқанын айқын көрсетеді.

Жатақхана толықтай қазіргі стандарттарға сай. Ғимаратта студенттердің қауіпсіздігін қамтамасыз ететін бейнабақылау жүйесі орнатылған. Әр бөлмеде жеке санитарлық торап, тұрмыстық техника және өздігінен ас әзірлеуге арналған жабдықтар қарастырылған. Мұнда тек тұруға ғана емес, сонымен қатар оқуға және демалуға да жағдай жасалған. Осылайша жаңа тұрғын орындары студенттер үшін барынша қолайлы әрі қауіпсіз орта ұсынады.

Алғашқы студенттердің легі қоныстана бастады. Бұл жатақханада бірден үш ірі жоғары оқу орнының жастары тұрады: Әл-Фараби атындағы Қазақ ұлттық университеті, «Тұран» университеті және Халықаралық ақпараттық технологиялар университеті (ХАТУ).

– Алматыда жаңа студенттік жатақхананың ашылуы – студенттерге қолайлы оқу мен тұрмыс жағдайын қамтамасыз ету жөніндегі Президент тапсырмасын орындаудағы маңызды қадам. Біз бүгін орын тапшылығы мәселесін шешіп қана қоймай, жастарымыздың болашағына әрі қаланың дамуына қызмет ететін заманауи инфрақұрылым қалыптастырып жатырмыз, – деді Алматы қаласы Жастар саясаты басқармасының басшысы Азиз Кажденбек.

Мұндай жобаларды жүзеге асыруда мемлекеттік қолдау маңызды рөл атқарады. Бүгінде екі тетік жұмыс істейді: жаңа жатақхана салған жағдайда алты жыл бойы әр студентке 230 АЕК көлемінде шығын өтеледі, ал ғимаратты қайта жаңғыртқан жағдайда сегіз жыл бойы 92 АЕК көлемінде төлем қарастырылған.

Жаңа оқу жылы басталғанға дейін Алматыда тағы үш заманауи жатақхана ашылады. Олардың жалпы сыйымдылығы 1100-ден астам орынға есептелген. Жыл соңына дейін 15 жаңа нысан пайдалануға беріліп, 6 мыңнан астам студент қосымша орынмен қамтылады.

Қазіргі таңда қалада 120-дан астам жатақхана және шамамен 60 хостел жұмыс істейді. Олардың бір бөлігі студенттерді уақытша орналастыру бағдарламасына тартылған. Әр жоғары оқу орнында студенттердің тұрмыстық мәселелері мен шағымдарын қабылдайтын жедел орталықтар бар.

Жаңа жатақхананың ашылуы Алматының студенттік баспана мәселесін шешудегі тағы бір нақты қадамы болды. Қала тек ағымдағы қажеттіліктерді жедел қамтамасыз етіп қана қоймай, болашаққа да орын қорын қалыптастырып отыр.

Алматы дәлелдеп отыр: біздің қалада студент болу – жайлы әрі заманауи ортада оқу, өмір сүру және болашақ құру деген сөз.