Алматыда Қала күніне орай гала-концерт өтеді
15 қыркүйек күні сағат 19:00-де Қабанбай батыр көшесінде Абай атындағы Қазақ ұлттық опера және балет театрының алдында «Мұра» гала-концерті өтеді.
Алматы, NEGE. Сахнада опера және балет жұлдыздары, оның ішінде халық артисі Нұржамал Үсенбаева және т.б. танымал адамдар өнер көрсетеді.
Іс-шараға байланысты 15 қыркүйек сағат 17:00-ден 23:00-ге дейін Қабанбай батыр көшесі Абылай хан даңғылынан Назарбаев даңғылына дейін жол жабылады.
Қала күнін мерекелеу аясында 14 қыркүйек сағат 16:00-де «Астана» алаңында LuxFM радиостанциясының фестивалі өтеді. Сахнада Мирас Жүгінісов, Айқын Төлепберген, Jazzdauren, Adam және басқа да танымал артистер өнер көрсетеді. Кештің басты қонағы – Грэмми сыйлығының иегері, продюсер DJ Imanbek.
Сондай-ақ «Астана» алаңында эстрада жұлдыздарының қатысуымен Almaty Cover Show өтеді. Концерт 17:00-де басталады, оған Нағима Есқалиева, Мейрамбек Беспаев, Kalifarniya, RaiM, Нұрлан мен Мұрат, ARO, Ерболат Құдайберген, Қайрат Түнтеков, Еркін Нұржанов, Айдар Тұрғанбай және т.б. әртістер қатысады.
Ескеретін жайт, қыркүйектің 12-сі мен 16-сы аралығында Төле би көшесінің бойы Панфилов көшесінен бастап Абылай хан даңғылына дейін жабылады. Бұл аралықта Астана алаңында Қала күнін мерекелеу аясында ұйымдастырылатын іс-шараларға дайындық жұмыстары жүргізіледі.