Алматыда әлі салынбаған LRT бойынша экологтар 8 ескерту жасады
Алматы шенеуніктері LRT-нің бірінші желісінің техникалық-экономикалық негіздемесін таныстырды, алайда жобаны экологтар бірден сынға алды.
Астана, NEGE. Экологтар жобада құрылыс қалдықтарының көлемі төмендетіліп көрсетілгенін мәлімдеді. Жұмыс өте ауқымды (18,3 км жол), бірақ құжаттарда көрсетілген қоқыс көлемі тым аз. Артық топырақ пен бетонды қайда шығаратыны белгісіз.
«Барлық жұмыс кезеңін ескере отырып, қалдықтардың түзілу көлемін қайта есептеу қажет, соның ішінде іске қосу, технологиялық, қосалқы процестер және техникаға қызмет көрсету барысында пайда болатын қалдықтар да қамтылуға тиіс», – делінген экологтар ескертуінде.
Жол Есентай мен Үлкен Алматы өзенін кесіп өтуі тиіс. Алайда жобада су қорғау аймақтары режимін сақтау бойынша талдау жасалмаған. Экологтар құжаттардан қауіптерді бағалауды да, өзендерді құрылыс кезіндегі ластанудан қорғау бойынша нақты шараларды да таба алмаған.
Дәнекерлеу және бояу жұмыстары «ұйымдастырылмаған» шығарындыларға жатқызылған. Болжам бойынша, құрылысшылар алматылықтар құрылыс кезінде қандай ауамен тыныстайтынын есептеуді жеңілдетуге тырысқан.
«Жасыл желектерге әсер етпейтіндігі жөніндегі қорытынды аумақты тексеру материалдарымен расталуы тиіс. Атап айтқанда, дендрологиялық зерттеу нәтижелері, жасыл желектердің орналасу сызбалары және өтемдік іс-шаралар ұсынылуы қажет, себебі жоба жолы қолданыстағы көшелер бойымен өтеді», – делінген құжатта.
Хаттамада шу мен дірілдің әсері қарастырылмағаны көрсетілген.
Сондай-ақ пайдалану кезеңінде атмосфералық ауаға әсерін бағалау талап етіледі (рельстердің тозуынан шығатын шаң және жылжымалы құрамды күтіп ұстау).
Оған қоса, уақытша инфрақұрылымнан, дизель станцияларынан және техникалардан шығатын қалдықтар есепке алынбаған.
Су тұтынуды егжей-тегжейлі есептеу қажет екені де атап өтілген.
