Алматыда 15 қаңтарда жойқын жер сілкінісі бола ма?
Алматы қаласы сейсмология институты мен төтенше жағдайлар департаментінің өкілдері алдағы жойқын жер сілкінісі туралы ақпаратқа қатысты мәлімдеме жасады.
Алматы, NEGE. "Біздің ғылыми орталықта зерттеу жұмыстары тұрақты түрде жүргізіліп жатыр. Жер қыртысына қатысты 200-ге жуық параметрді зерттеп, қорытынды жасаймыз. Болжам комиссиясының қорытындысына сәйкес, осы аптаның қысқа мерзімді болжамына сәйкес, 10 мен 17 қаңтар аралығында Алматы болжамды полигонында 5,5 баллдық жойқын жер сілкінісі болмайды. 2024 жылға арналған орта мерзімді болжам қаңтар айының соңында дайын болады. Мәліметтер базасы бойынша пікір білдіреміз, біздің бөлімде он зертхана бар. 1998 жылдан бастап Алматы қаласының болжамдары бекітіліп келеді. Тұрғындардан үрейленбей, сақтық шараларын білуді сұраймыз", - деді ТЖМ сейсмологиялық бақылау және зерттеулер ұлттық ғылыми орталығының орынбасары Нұрсәрсен Өзбеков.
Сейсмологтардың сөзінше, блогерлердің жер сілкінісі болады деген болжамының ғылыми негізі жоқ.
"Өткен жылы біз де 2023 жылға арналған болжамдық комиссияның қорытындысын шығардық. Оған сәйкес магнитудасы 5,5 және одан жоғары болатын жойқын жер сілкінісі алдағы уақытта болмайды. Өздеріңіз көріп отырғандай, бұл болжам расталды. Қазір әлеуметтік желілерде Алматыда 15 қаңтарда жер сілкінісі болуы мүмкін деген ақпарат таралуда. Блогерлер мұндай болжамды қалай жасағаны белгісіз. Өйткені оларда қандай да бір болжам жасау үшін арнайы техника мен технология жоқ. Олардың мәлімдемелері негізсіз. Ақпараттық бюллетеньге назар аударудың қажеті жоқ. Дүрбелеңге негіз жоқ", - деді маман.