Алматы еліміздің мемлекеттік бюджетінің кіріс бөлігінің төрттен бірінен астамын қамтамасыз етеді
2022 жылы Алматының экономикалық өсуі 5,1% деңгейінде болды. Бұл деректермен қала әкімінің орынбасары Асқар Әмірин мәслихаттың VI сессиясында бөлісті.
Алматы, NEGE. Ол экономиканың өсуінің драйвері 13%-ға артқан өңдеу өнеркәсібі болғанын атап өтті. Қабылданып жатқан қолдау шаралары мегаполис экономикасындағы ШОБ үлесін 57,8%-ға дейін ұлғайтуға мүмкіндік берді.
"Алматы мемлекеттік бюджеттің кіріс бөлігінің төрттен бірінен астамын қамтамасыз ететін донор болып табылады. 2022 жылдың қорытындысы бойынша Алматының үлесі 26,2%-ды құрады. 2022 жылы республикалық бюджетке 2 трлн 961,7 млрд теңге түсім жіберілді. Өткен жылмен салыстырғанда өсім 41,9-ды құрады", - деді Асқар Әмрин.
Оның айтуынша, жергілікті бюджетке 1 трлн 175,2 млрд теңге түскен, бұл 2021 жылмен салыстырғанда 42%-ға артық. Түсімдердің қарқынды өсуі барлық бюджеттік міндеттемелердің орындалуын қамтамасыз етті.
Алматы экономикасы сенімді өсуде. Өткен кезеңнің нәтижелері оң динамика туралы айтуға мүмкіндік береді: 2022 жыл ковидтік кезең әлеуметтік-экономикалық оңалтудың маңызды кезеңіне айналды.
Алматыда іскерлік белсенділікті толық қалпына келтіруге,инвестициялық әлеуетті ұлғайтуға қолжеткізілді – шетел компанияларының қала экономикасына салымдарының ағыны 12%-ға өсті, 1,4 трлн теңге тартылды.
Оң өзгерістерді еңбек нарығы көрсетуде: 2022 жылы 57,5 мың жұмыс орны құрылды. Мегаполис экономикасы 5,1%-ға өсті. 2025 жылға дейінгі даму бағдарламасына және 2030 жылға дейінгі орта мерзімді перспективаларға сәйкес Алматының даму жоспарының негізгі міндеттері кезең-кезеңімен іске асырылуда.
2022 жылы осы мақсаттарға 460 млрд теңге бөлінді.
