Алатау ауданының бюджеті 3,7 есеге ұлғайды
Алатау ауданының бюджеті 3,7 есе – 8,2 млрд теңгеден 30,6 млрд теңгеге дейін ұлғайды.. Қызметкерлер саны 20 адамға көбейді. Бұл туралы қала әкімі Ерболат Досаев аудан тұрғындарымен кездесуде айтты.
Алматы, NEGE. Аудан әкімдіктеріне жаңа функция беру аясында қаржыландыру көлемі артты.
«Мұндай елеулі қолдау сіздердің аудан әкіміне ең өзекті мәселелерді сапалы әрі жедел шешуге мүмкіндік беретініне сенімдімін», - деді қала басшысы.
1 сәуірден бастап аудан әкімдіктеріне 15 функцияны берумен бірге бюджет көлемі де өсті.
Алатау ауданында 150 км инженерлік желі жүргізіледі
Бұған қоса, 5 канализациялық-насос станциясы салынады.
Алатау ауданының әкімдігі жақын арада «Теректі», «Алғабас», «Болашақ», «Шапағат» шағын аудандарында ұзындығы 150 км инженерлік желі жүргізуге кіріседі.
«Мердігерлер анықталды. Жұмыстың басталуы биыл мамыр айына, аяқталуы 2024 жылдың желтоқсанына жоспарланған. «Рахат-Мәдениет» шағын ауданында желілердің құрылысы 2023 жылы шілдеде басталып, 2024 жылдың соңына дейін аяқталады», - деді қала басшысы.
5 канализациялық-насос станциясы салынып жатыр. Бұл «Самғау» және «Өжет» шағын аудандарында канализация желілерін пайдалануға мүмкіндік береді. Жұмысты жыл соңында аяқтау көзделіп отыр.
«Саялы-2» шағын ауданында 550 орындық мектеп салынып жатыр. 12 050 орындық тағы 7 мектептің құрылысы осы жылдың 3 тоқсанында басталады. Қазір аудан мектептерінде шамамен 4600 орын тапшы.
Олардың ішінде 550 орындық мектеп «Зерделі» шағын ауданында салынады. «Жайлы мектеп» жобасы аясында «Самғау», «Алғабас», «Қарасу», «Теректі» шағын аудандарында, сонымен бірге, «Әйгерім» шағын ауданында 2000 орындық мектеп бой көтереді.
Ал «Ақбұлақ» шағын ауданында №154 мектепті бұзып, 1500 орындық мектеп пайда болады. Мектептер келесі жылдың соңына дейін салынады.
Медициналық қызмет көрсету сапасын арттыру үшін 2023 жылдың ақпан айында «Саялы» және «Қарасу» шағын аудандарында жоспарлы қуаттылығы ауысымына 200 адам қабылдайтын 2 дәрігерлік амбулаторияның құрылысы басталды.
Құрылыс 2024 жылдың І-ші тоқсанында аяқталады. Осылайша, ауданда тұрғындарды әлеуметтік инфрақұрылыммен қамтамасыз ету мәселелері жүйелі түрде шешіліп келеді.
Алатау ауданында үнемі су басатын жерлердің мәселесі шешілді. 18 учаскенің 16-сында жұмыстар орындалды, қалған 2 учаске бойынша жұмыстарды бір айдың ішінде аяқталады.
«Сонымен қатар, биыл біз Қарасу көлін механикалық тазарту жұмыстарын бастадық. Бұл көл алғаш рет тазартылып жатқанын атап өткім келеді. Жұмысты осы жылдың қыркүйек айында аяқтаймыз», - деді қала басшысы.
Алатау ауданы 2025 жылға қарай көше жарығымен толық қамтылады. Алатау ауданында 750 бейнемониторинг камерасы орнатылады.
«Ауданда жол қауіпсіздігін жақсарту мақсатында 96 «Сергек» кешені жұмыс істейді. Сонымен қатар, осы I-ші тоқсанда тағы 97 «Сергек» аппараттық-бағдарламалық кешені орнатылды. Осылайша, аудан бойынша 193 «Сергек» камерасы қызмет көрсетеді», - деді қала әкімі Ерболат Досаев халықпен кездесуде.
Көшені толық жарықтандыру үшін 2022 жылы Алатау ауданының 135 көшесіне сыртқы жарық орнату жұмыстары жүргізілді. Биыл ауданның жарығы жоқ 123 көшесі бойынша жобалау-сметалық құжаттама әзірлеу жоспарланған. 2025 жылы аудан 100% көше жарығымен қамтылады.
