«Ақтөбе» футбол клубының бас бапкері қызметінен кетті
«Ақтөбе» футбол клубының бас бапкері, ресейлік маман Владимир Муханов қызметінен кетті.
Алматы, NEGE. Клубтың баспасөз қызметінен мәлім еткеніндей, «Таразбен» өткен матчтан кейін 68 жастағы В.Мухановпен келісімшартты тоқтату жөнінде шешім қабылданған. Ресейлік маман ақтөбеліктерді 2021 жылдың шілдесінен бері жаттықтырып келді.
Таразда жергілікті командадан 0:3 есебімен ойсырай ұтылған «Ақтөбе» ел чемпионатында сегізінші орында тұр. Команданың бас бапкері міндетін уақытша Петр Бадло атқарады. Ақтөбеліктер тоғызыншы турда 2 мамыр күні өз алаңында «Ақжайықты» қабылдайды. Еске салайық, бұдан бұрын футболдан Қазақстан чемпионатында «Ақжайықтың» «Ақсудан» ұтылып қалғанын жазған болатынбыз. Бүгін Ақтауда Қарағандының «Шахтерін» 4:0 есебімен жеңген «Каспий» командасы 16 ұпай жинап, чемпионатта қайтадан көш бастады.