АҚШ Ресейдің Украинаға көпжақты жауап беруі мүмкін екенін болжайды
Ресей стратегиялық авиабазаларға жасалған шабуылдардан кейін Украинаға қарсы асимметриялы жауап беруі мүмкін, деп хабарлайды DW.
АЛМАТЫ, NEGE. Мәліметтерге сәйкес, алдағы күндері Ресей дрондар мен зымырандарды пайдаланып, Украинадағы арнайы қызметтердің штабтары мен әскери инфрақұрылым нысандарын нысанаға алуы ықтимал.
АҚШ әскери сарапшысы Майкл Кофманның пікірінше, Ресей баллистикалық зымырандарды қолдануы мүмкін, бірақ ауқымды эскалация мүмкіндіктері шектеулі, себебі қолда бар ресурстарының көп бөлігі бұрыннан жұмылдырылған.
Сонымен қатар, Украина президенті Владимир Зеленский ABC News арнасына берген сұхбатында, дрондар жіберілген жүк көліктерінің жүргізушілері олардың нақты не тасып жатқанын білмегенін айтты. Ол Украина тек өзінің қаруын пайдаланғанын атап өтті.
АҚШ пен НАТО мәліметтері бойынша, 1 маусымда басталған «Өрмек» операциясының нәтижесінде Ресейдің 41 ұшағы, соның ішінде Ту-95, Ту-22М3 стратегиялық бомбалаушылары мен А-50 барлау ұшағы істен шыққан. Шығын бірнеше миллиард доллар көлемінде бағалануда. Украина бұл операцияны 1,5 жыл бойы дайындағанын мәлімдеді.
Кеше Украина қарулы күштері Ресейдің екі аэродромына жаңа соққы жасады. Украина ҚК мәліметі бойынша, Саратов облысында үш жанармай қоймасы зақымданып, үлкен өрт шыққан. Рязань облысындағы Дягилево аэродромында да өрт тіркелді, бірақ соққы нәтижелері нақтыланып жатыр.
Ресей Қорғаныс министрлігінің дерегінше, 6 маусымға қараған түні Украинадан жіберілген 174 дрон елдің 12 өңірінде, соның ішінде Саратов, Рязань облыстары мен Қырымда атып түсірілген.
