Ақпанда теңге бағамы 0,7%-ға нығайды – Ұлттық банк
Ұлттық банктің валюта нарығы туралы ақпараттық хабарламасына сәйкес, ақпан қорытындысы бойынша теңге бағамы 1 АҚШ доллары үшін 497,69 теңгеге дейін 0,7%-ға нығайды.
Астана, NEGE. Сондай-ақ, Орталық банк мәліметінше, Қазақстан қор биржасындағы сауда-саттықтың орташа бір күндік көлемі бір айда 306 млн АҚШ долларынан 335 млн АҚШ долларына дейін ұлғайды. Сауда-саттықтың жалпы көлемі 6,7 млрд АҚШ долларына жетті.
«Ақпан айында Ұлттық қордан 400 млн АҚШ долларында валюта сатылды, бұл өз кезегінде республикалық бюджетке трансферт бөлуді қамтамасыз етуге мүмкіндік берді. Ұлттық қордан сату үлесі жалпы сауда-саттық көлемінің 6%-ы болды және күніне 20 млн АҚШ долларынан асқан жоқ.
Күтілетін фискалдық түсімдерді ескергенде, Үкіметтің алдын ала болжамды өтінімдері бойынша наурыз айында республикалық бюджетке трансферт бөлуге Ұлттық банк Ұлттық қордан 400 млн АҚШ долларынан 500 млн АҚШ долларына дейінгі мөлшерде валюта сатылады деп болжайды», – делінген банк хабарламасында.
Ақпан айында «айырбастау» операциялары аясында 350 млрд теңге алынған. Наурызда осы мақсат үшін 350 млрд теңге баламасында валюта сату болжанып отыр.
«Ұлттық қордың қаражатымен операциялар жүргізу кезінде, сондай-ақ «айырбастау» тетігін іске асыру кезінде Ұлттық Банк нарықтық бейтараптық қағидатын ұстанады, бұл шетел валютасын тұрақты және біркелкі сатуды білдіреді», – дейді Ұлттық банк өкілдері.
Ұлттық Банк ақпанда валюталық интервенция жүргізбеген.
Сондай-ақ, Орталық банк ақпан айында зейнетақы активтерінің инвестициялық портфеліне АҚШ долларын сатып алмаған. Наурызда да валюта сатып алу жоспарланбаған.
