Air Astana және FlyArystan компанияларына авиаотынға байланысты айыппұл салынды
Көлік министрлігі Air Astana және FlyArystan әуекомпанияларынан авиаотынға қатысты бұзушылықтар анықтады.
Астана, NEGE. Әуе отынымен қамтамасыз ету мәселелері бойынша жүргізілген тексеру кезінде екі ірі әуекомпания авиаотын көлемі бойынша бұрмаланған мәліметтер ұсынғаны анықталған.
«Осыған байланысты Қазақстан Республикасының Әкімшілік құқық бұзушылық туралы кодексіне сәйкес аталған әуекомпанияларға қатысты әкімшілік сипаттағы шаралар қолданылып, олардың әрқайсысына 100 АЕК (432 500 теңге) мөлшерінде айыппұл салынды», – делінген хабарламада.
Еске салсақ, бұған дейін авиаотын бағасын көтергені үшін Семей халықаралық әуежайына 8,8 млн теңге айыппұл салынған еді.