Air Astana ұшағы Ақтөбеге шұғыл қонуға мәжбүр болды
8 мамыр күні Астана – Франкфурт бағыты бойынша KC921 рейсін орындаған Air Astana әуе компаниясының ұшағы Ақтөбеге шұғыл қонды.
Астана, NEGE. Тасымалдаушының мәліметінше, әуе кемесі Астанадан сағат 08:54-те ұшып, техникалық себептерге байланысты 11:34-те Ақтөбеге қонған. Экипаж қауіпсіздік талаптарына сәйкес қону туралы шешім қабылдаған, ұшақ штаттық режимде қонды.
Жолаушыларды ары қарай тасымалдау үшін әуе компаниясы Алматыдан қосалқы ұшақ жіберді. Ақтөбеден ұшып шығу уақыты 14:20-ға жоспарланған.
Air Astana компаниясы шұғыл қонуға нақты қандай техникалық ақау себеп болғанын нақтылаған жоқ.