Адвокат: Украинада Сабуровтың үстінен қылмыстық іс қозғалды
Украинада қазақстандық комик Нұрлан Сабуровтың үстінен қылмыстық іс қозғалды. Бұл туралы адвокат Евгений Пронин өзінің Telegram арнасында хабарлады.
Астана, NEGE. Тергеу Украина Қылмыстық кодексінің 111-2-бабы 1-бөлігі, яғни «агрессор мемлекетке жәрдемдесу» бабы бойынша жүргізіліп жатыр.
«Украина Қауіпсіздік қызметі менің Қазақстан Республикасының азаматы Нұрлан Сабуровтың қылмыстық құқықбұзушылық жасағаны туралы арызым негізінде сотқа дейінгі тергеуді бастады», – деп жазды Евгений Пронин.
Еске салайық, бұған дейін ресейлік БАҚ-та Сабуровқа Ресей Федерациясының аумағына 50 жылға кіруге тыйым салынғаны жайлы ақпарат тарады. Әзілкеш бұл жаңалықты Дубайдан Мәскеуге ұшып келген сәтінде Внуково әуежайында бірақ білген. Ол Қазақстанға оралуға мәжбүр болды.
Telegram-дағы «Важные истории» арнасының мәліметінше, Сабуров «ресейшіл» ұстанымын көрсету үшін «арнайы әскери операцияның қажеттіліктеріне» арнап 10 «Эндуро» мотоциклін беріп, сондай-ақ «Все для Победы» қорына 2 миллион рубль аударған.
