Әбілқайыр Сқақов депутаттарға Павлодар облысының дамуы туралы есеп берді

Жедел деректер бойынша жеті айдың ішінде аймақ экономикасының өсімі 3%-ды құрады. Өңдеу өнеркәсібінің өсімі 6,7%-ды құраса, оның ішінде, химия және фармацевтика өнеркәсібінің, мұнайды қайта өңдеу және машина жасау өнімдерін жасап шығару сәйкесінше 1,5, 1,3 және 1,2 есеге өскен.

– Екібастұз қаласындағы теміржол кластері тұрақты дамып келеді. Бұл салада осы айда теміржолға аса қажетті клеммалар мен бұрамаларды әзірлеу өндірісі толық қуаттылық деңгейіне шықты. Осылайша, Қазақстандағы теміржол көлігі құрылысының 70%-ан астамы Екібастұзда шоғырланды, – деді Әбілқайыр Сқақов.

Аймақ басшысы Екібастұз қаласының кешенді дамуының жоспарына тоқталды. Құжат бойынша 119 іс-шара қарастырылған, олардың 87%-ы жеке инвестициялар есебінен жүзеге асырылады. Жоспар экономиканы декарбонизациялауға, яғни, қала өндірісіндегі көмірқышқыл газын шығаратын өндірістерді азайтуға, қаланың кадрлық потенциалын нығайтуға, сонымен бірге, кеншілер шаһарының инфрақұрылымын жақсартуға және бірқатар әлеуметтік мәселелерді шешуге бағытталған.

Күн тәртібіндегі басты мәселе – коронавирустық инфекциямен күрес болып қала береді. Павлодар облысында инфекциялық қызмет едәуір нығайды. Павлодардағы облыстық аурухана мен Екібастұз қалалық ауруханасының жанындағы екі жаңа инфекциялық бөлімше жақын арада ашылады деп күтілуде.

Осылайша, өңірдегі инфекциялық жатын орындар саны өткен жылмен салыстырғанда 2,4 есеге, яғни 550 орынға дейін артты.

– Осы жылы денсаулық сақтау саласының бюджеті 2,7 есеге ұлғайды. Ұлғайтылған қаражат есебінен 40 медициналық ұйымға құрал-жабдықтар сатып алу, алты нысанның құрылысы мен жөндеу жұмыстарын жүргізу қарастырылған. Тағы да алты денсаулық сақтау мекемесінің күрделі жөндеу жұмыстарына жобалау-сметалық құжаттама әзірленіп жатыр. Сонымен бірге, дәрігерлік амбулатория, фельдшерлік-акушерлік пункт және медициналық пункттің құрылыстары бойынша үш типтік жоба әзірленіп жатыр. Олар бойынша медициналық көмекке зәрулік бар облыстың 11 ауылында тиісті мекемелер салынатын болады, – деді Әбілқайыр Сқақов.

Білім беру саласының бюджеті де айтарлықтай өсті. Атап айтқанда, мектептердің күрделі жөндеуі мен модернизациясына бөлінетін қаржы 12 есеге өсті. Павлодар облысында оқу мекемелері ауладан бастап құрал-жабдықтарға дейін толықтай жаңартылатын «Заманауи мектеп» жобасы жүзеге асырылып жатыр. Осы жылы облыс орталығында екі жаңа мектеп пен қолданыстағы екі білім ошақтарының қосалқы ғимараттары іске қосылуы тиіс. Осылайша, 1 мыңнан астам жаңа оқу орындары пайда болады.

– Ағымдағы жылы ерекше қажеттіліктері бар адамдарды әлеуметтік оңалтуға 1,3 млрд теңге бөлінді. Тоқсан сайын үйінде ерекше балаларды тәрбиелейтін отбасылардың шығындары өтеледі. Осы өтемақының көлемін ұлғайту жоспарланып отыр. Бес мыңға жуық отбасы жалпы көлемі 1 млрд теңгеге жуық атаулы әлеуметтік жәрдемақы алады. Әлеуметтік аз қамтылған топтардың 10 мыңға жуық өкілі 70 млн теңгеден астам сомаға қайырымдылық қолдауға ие болды, – деді әкім әлеуметтік қорғау саласы туралы.

Аймақ басшысының деректері бойынша еңбек нарығындағы жағдай тұрақты. Жұмыссыздық 4,8%-ға азайып, 16 мыңға жуық жаңа жұмыс орындары құрылды. Бұған жыл басынан бері саны 1700-ге дейін көбейген шағын және орта бизнес нысандарының ашылуы да септігін тигізді. Өңірде кәсіпкерлерді қоладуға «Бастау» бағдарламасының түлектеріне шағын несие беруге 1 млрд теңге бөлінді.

Жыл басынан бері Павлодар облысында 950 кезекте тұрған азамат жаңа пәтерлердің кілттеріне ие болды. Жалпы құны 82 млн теңгені құрайтын тұрғын үй сертификаттары берілді. Осы жылы өңірде алты көп қабатты үй іске қосылып, тағы да 18 үй салынып жатыр.

Аймақ экономикасын диверсификациялау агроөнеркәсіптік кешен есебінен де жүзеге асырылып жатыр. Жыл соңына дейін суармалы егістік алқаптарының ауданын 135 мың гектарға дейін ұлғайту жоспарланып отыр. Облыста тазартылған күнбағыс майының өндірісі іске қосылуы тиіс. Ауыл шаруашылығы өнімдерін қайта өңдеу көлемі 102,2%-ға артып, 55 млрд теңгеі құрады.

– Осы жылы мал шаруашылығы саласында жиырмадан астам инвестициялық жоба жүзеге асырылып жатыр. Қазіргі таңда сегіз нысан іске қосылды. Олардың қатарында үш мал шаруашылығы базасы мен екі сүт-тауарлық ферма бар. Шаруашылықтың барлық санаттары бойынша сүт өндірісі 2,8%-ға, еттің көлемі 6,8%-ға артты, – деп хабарлады Әбілқайыр Сқақов.

Аталған салалардан бөлек, облыс басшылығы үшін балалар мен жасөспірімдер спортын дамыту, цифрландыру, инвестициялар тарту және басқа бағыттардағы жұмыс басымдыққа ие болып қалады.