Алматыда 14 мың шаршы метр жол қайта жөнделді
«Жол активтерінің ұлтық сапа орталығы» Алматы филиалының мамандары жол құрылысындағы мердігер компанияларды 180 миллион теңгеден астам қаржының жұмысын қайта жасауға мәжбүрледі.
Алматы, NEGE. 2023 жылдың басынан бергі ескертулер мен тексерістер нәтижесінде Алматыда 14 мың шаршы метрден астам асфальтбетон жабыны қайта төселген.
2023 жылдың басынан бастап жол сапасын қадағаушы мекеме Қала құрылысын бақылау басқармасына 5 хат жолдады. Оның ішінде орташа жөндеу бойынша 4 хат және ағымдағы жол жөндеу бойынша 1 хат. Аталған хаттардың нәтижелері бойынша Алматы қаласында жауапты орындарға 3 айыппұл салды. Техникалық қадағалау қызметіне 1 728 000 теңге көлемінде1 айыппұл, мердігер компанияға 2 934 500 теңге болатын 2 айыппұл салынды.
Сонымен қатар, Жол активтерінің ұлттық сапа орталығы мемлекет басшысы Қасым-Жомарт Тоқаевтың өткен жолдауында айтқан жол сапасын жақсартуға қатысты тапсырмаларын орындауда. Мекеменің Алматы қаласы бойынша филиалының директоры Мәулен Әліповтің айтуынша, 2023 жылы кәсіпорын жоспарланған межені 100 пайыз орындаған. Қазір Алматы қаласында жалпы ұзындығы 3 100 шақырымдай автокөлік жолы бар. Мемлекет басшысының «шетсіз қала» деген тапсырмасы бойынша қаламызда орасан-зор жұмыстар атқарылып жатыр.
